Xaçmazda yaşayan qadın özünü və övladını dolandırmaq üçün cizgi filmlərindən tanıdığımız qəhrəmanların kuklalarını hazırlayır. Bu barədə ShimalNews 29 iyun tarixində BBC News-a istinadən məlumat verir.
Könül Məmmədova 2 ilə yaxındır rayonda uşaqların əyləncəsi və inkişafı üçün yeni imkanlar yaratmaqdadır. O, kukla teatrı yaratmaq arzusundadır:
“Uşaqlarımıza rayon yerində getmək üçün yer yoxdur. Nağıl və tamaşalar olsa, onlar üçün daha maraqlı olar”.
Maddi vəziyyətinin aşağı olması Könülün ideyasını reallaşdırmağa imkan vermir. Bu səbəbdən o, hələlik öz əlləri ilə hazırladığı gəlinciklərlə tamaşaçı qarşısına çıxmaq istəyir:
“Bu kuklanı mən tikib başa yetirincə hardasa 40-50 manata başa gəldi. Gələcəkdə istəyirəm digər kuklalar olsun, əsl teatr kuklaları olsun. Çünki əsl kukla teatrında imkanlar çoxdur, orada elə bir texnikalarla quraşdırırlar ki, onların ağzı tərpənir, əlləri tərpənir, gözləri də tərpətmək olur. Daha canlı görünür. Bunların birinin qiyməti 300, 400, 500 manatdır. Yani mən bir tamaşa qurmaq üçün, orada ən azı 5 obraz var, 5 obraza 300 manata vuranda olur 1500, ona da hələ ki gücüm yoxdur”.
K.Məmmədovanın qurmaq istədiyi teatrda hələlik yeganə tamaşaçısı qızı Sara Xatundur. O, ilk addım kimi Youtube-da “Sara Xatun və Anası” adlı kanal açıb.
Zəhmətkeş ana ev işləri ilə yanaşı, həm də bağda işləyir. Bundan əlavə aşpazlıq kursuna da yazılıb. Məmmədovanı təəssüfləndirən yeganə məqam isə ali təhsilin olmamasıdır:
“Hər zaman özüm barədə düşünəndə həmişə istəyirdirm ki, ali təhsilim olsun, çünki qızın təhsili olmalıdır. Məndə çalışacağam ki, qızım təhsilli olsun, qız övladına oğul övladından təhsil daha çox lazımdır. Çətinliklər olur, təhsil alanda o sənə bir dayaqdır, köməkdir. Tənha qaldıqda kiməsə möhtac olmamalıdır, anası kimi güclü olmalıdır”.
