Xaçmazda müəllim yaratdığı biznesi haqda danışıb. Bu barədə ShimalNews 18 avqust tarixində “UNDP Azerbaijan”-a istinadən məlumat verir.
Rayonda çalışan ibtidai sinif müəllimi Zülfiyyə Abiyeva, həmçinin repetitorluq fəaliyyəti ilə məşğul olur. O, uşaqlara xarici dil tədris edir.
Zülfiyyə Xaçmaz Qadın Resurs Mərkəzinə müraciət edərək öz repetitorluq fəaliyyətini daha da təkmilləşdirmək, onu kiçik biznesə çevirmək istəyib.
“İştirak etdiyim təlimlərdə sahibkarlıq, bizneslə bağlı biliklər əldə etdim, gəlir və xərclərimi planlamağı öyrəndim”, - müəllim bildirib.
Zülfiyyə “Sahibkarlığa və məşğulluğa iqtisadi dəstək” layihəsinin qaliblərindən biri olub və lazımi avadanlıqlarla təmin edilib.
“Azyaşlı uşaqlar rəngləri çox sevirlər. Onlara xarici dili sevərək öyrətmək, sözləri asan qavramaları üçün çoxlu rəngli materiallar istifadə edirəm. Printerim olmadığı üçün hər dəfə bu materialların çap etdirilməsinə xərcim çox çıxırdı. Artıq bu xərcim aradan qalxıb, şagirdlərim üçün daha da maraqlı materiallar hazırlaya bilirəm” - deyə müəllim bildirib.
