Xaçmazın fındıq bağlarında məhsul yığımına iyulun sonunda başlanılacaq. Bu haqda ShimalNews 9 iyul tarixində “Azərtac”a istinadən məlumat verir.
Təsərrüfatçılar bildirirlər ki, ötən il rayondakı bağlardan 8 min 462 ton fındıq yığılıb. Keçən illə müqayisədə cari il ağaclarda 30-40 faiz daha çox məhsul olduğunu bildirirlər.
“Fındıq yığımı çətin prosesdir. Çünki ağacdan əllə toplanır. Yığımı gecikdirdikdə isə məhsul ağacın dibinə tökülür. Toplamaq daha da çətinləşir. Bu il məhsul boldur. Ağaclar ötən illə müqayisədə yaxşı bar gətirib. Biz məhsulu, adətən, ya yerli bazarda satırıq, ya da rayondakı qəbul məntəqələrinə təhvil veririk”, - deyə təsərrüfatçı Mübariz Bəşirov söyləyib.
Fındıq yığımı prosesi sentyabradək davam edir.
Rayon ərazisində fəaliyyət göstərən 10-dan çox fındıq qəbulu məntəqəsi, emalı və təkrar emalı fabrikləri haqda məlumat vermişdik.
