Xaçmazın Çaykənarı kənd orta məktəbinin bir zaman 2000 şagirdi var idi. İndi isə o, şəraitsiz və müəllimsiz qalıb. Bu haqda ShimalNews 7 noyabr tarixində Real TV-yə istinadən məlumat verir.
Xaçmazın Milli Qəhrəmanı Yavər Şahbazovun adını daşıyan təhsil müəssisəsinin 5 fənn üzrə müəllimi yoxdur. Azərbaycan dili və ədəbiyyat, fizika, kimya və ingilis dili digər fənlərin müəllimləri tərəfindən tədris edilir.
Məktəbin binası yararsız hala düşüb. Onun pəncərələri sınıb, otaqları odunla isinir. Bu, öz növbəsində şagirdlərin sağlamlığına və davamiyyətinə təsir göstərir. Burada təhsil alan 240 şagirdin valideynlərini də ən çox bu məsələ narahat edir.
Məsələ ilə bağlı Xaçmaz təhsil sektorundan bildirildi ki, tezliklə məktəbdə yaşanan müəllim çatışmazlığı ilə bağlı tədbir görüləcək. Eləcə də yaxın gələcəkdə məktəbin əsaslı təmiri nəzərdə tutulub. Bu zaman təhsil müəssisəsi müasir istilik sistemi ilə təmin olunacaq.
