Mərkəzi Seçki Komissiyası növbədənkənar parlament seçkilərinin ilkin nəticələrini ictimaiyyətə təqdim edib. ShimalNews xəbər verir ki, 57 saylı Xaçmaz şəhər seçki dairəsindən namizədliyini irəli sürən Ağalar Vəliyev 64,2% səslə seçkilərin qalibi olub.
Ağalar Vəliyev 1957-ci il iyulun 23-də Yevlax şəhərində anadan olub. O, Azərbaycan İnşaat Mühəndisləri İnstitutunun Sənaye və mülki tikinti fakültəsində təhsil alıb.
1978-ci ildən Yevlax dəmir-beton məmulatı zavodunda fəhlə, texnik-laborant, mühəndis, şöbə rəisi, baş mühəndis və direktor vəzifələrində çalışmışdır. 1991-ci ildən «Azəravtoyol» İstehsalat Birliyi Yevlax Körpütikinti Kombinatının baş direktoru, 1993-cü ildən Yevlax 2 saylı «Yoltəmirtikinti» trestinin rəisi, 1996-cı ildən «Azəraqrartikinti» Dövlət Şirkətinin prezidenti, 1998-ci ildən isə «Azəraqrartikinti» Açıq Səhmdar Cəmiyyəti İdarə Heyətinin sədri olmuşdur. 2015-ci ildən «Azəraqrartikinti» Açıq Səhmdar Cəmiyyəti Müşahidə Şurasının sədridir.
Ağalar Vəliyev IV və V çağırış Azərbaycan Respublikası Milli Məclisinin deputatı olub. Yeni Azərbaycan Partiyasının üzvüdür. 2010-cu ildən "Əməkdar mühəndis" fəxri adına layiq görülüb, 2012-ci ildə “Şöhrət” ordeni, 2017-ci ildə isə 2-ci dərəcəli "Vətənə xidmətə görə" ordeni ilə təltif edilmişdir.
Ailəlidir, bir oğlu var.
