Xaçmaz, Şabran, Siyəzən və digər rayonlarda keçirilən “Xəzəri qoruyaq” kampaniyası yekunlaşıb. Bu barədə ShimalNews 4 oktyabr tarixində Ekologiya və Təbii Sərvətlər Nazirliyinə istinadən məlumat verir.
Sentyabr ayında start götürən təmizlik aksiyasında 1500 könüllü 10 hektar ərazini 5 ton tullantıdan təmizləyib.
Kampaniyanın keçirilməsində məqsəd ölkədə ekoloji durumun yaxşılaşdırılması, əhalinin bu sahədə maarifləndirilməsi və ətraf mühitə məsuliyyətlə yanaşma prinsiplərini təbliğ etməkdir. Bu tədbir 10 ildən çoxdur ki, təşkil edilir.
Aksiyasının təşkilatçılığında Regional İnkişaf İctimai Birliyi, Azərbaycan Könüllü Təşkilatları İttifaqı, “Təmiz Şəhər” ASC, Azərbaycan Dövlət Reklam Agentliyi, ADA Universiteti Fondu, Global Shapers Shamakhi Hub, ABŞ-nin Azərbaycandakı Səfirliyi, ABŞ Təhsilli Azərbaycan Məzunları İctimai Birliyi, Azərbaycan Jurnalistlər Şəbəkəsi İctimai Birliyi, Bakı Nəqliyyat Agentliyi, Bakı Beynəlxalq Dəniz Ticarət Limanı, LU-MUN Holding və “Baker Hughes” şirkəti iştirak edib.
Bu il “Xəzəri qoruyaq!” Beynəlxalq Sahilyanı Təmizlik Kampaniyası Ekologiya və Təbii Sərvətlər Nazirliyinin, ASAN Xidmətin, "ASAN Könüllüləri" Təşkilatının dəstəyi, “Coca-Cola”, “Carlsberg Azerbaijan”, “PAŞA Bank” və “Bakcell” şirkətlərinin tərəfdaşlığı və “EcoHub” ekoloji platformasının icraçı tərəfdaşlığı ilə həyata keçirilib.
