Şəki rayonunun Aşağı Şabalıd kəndi ərazisindən keçən Şin çayında suyun bəndlərin üzərindən aşması əhalinin narahatlığına səbəb olub.
Bu barədə Shimal.News-a məlumat daxil olub.
Sakinlərin sözlərinə görə, 2008-ci ildə kəndin və ətraf ərazilərin sel sularından qorunması məqsədilə Şin çayının həmin hissəsində bir neçə bənd inşa edilib. Lakin sonrakı illərdə sel suları ilə çay yatağına daşınan daş-çınqıl və digər materiallar məcrada toplanıb.
Nəticədə çay yatağının səviyyəsi yüksəlib və selin gətirdikləri bəndlərin yuxarı hissəsinə qədər çatıb. Hazırda iki bəndin üzərindən suyun aşaraq ətrafa yayıldığı bildirilir.
Kənd sakinləri məsələ ilə bağlı aidiyyəti qurumlara da müraciət etdiklərini deyirlər.
Onların sözlərinə görə, çay yatağından daş, çınqıl və digər materialların götürülməsinə icazə verilməməsi məcranın zamanla dolmasına səbəb olur. Sakinlər hesab edirlər ki, bu vəziyyət aradan qaldırılmasa, gələcəkdə güclü sel zamanı kənd və ətraf ərazilər üçün təhlükə yarana bilər.
Vətəndaşlar çay yatağının vəziyyətinin araşdırılmasını və sel təhlükəsinin qarşısının alınması üçün müvafiq tədbirlərin görülməsini istəyirlər.
