Şabran rayonunda qeydə alınmış yanğın insan amili ilə bağlı səhlənkarlıq, ehtiyatsızlıq səbəbindən baş verib. Bu barədə ShimalNews 3 sentyabr tarixində Fövqəladə Hallar Nazirliyinə (FHN) istinadən məlumat verir.
Çuxurəzəmi kəndi istiqamətində, meşə ərazisində baş vermiş yanğın adları məlum olmayan sakinlər tərəfindən törədilib. Onlar meşəyə təbii bal yığmaq üçün daxil olublar. Bal olan ağacı müəyyən edərək onu rahat yığmaq üçün yanında ocaq qalayıblar ki, tüstü arıları qovsun.
Ehtimal edilir ki, bal yığıldıqdan sonra ocaq söndürülməyib və bu, yanğına səbəb olub. Nəticədə alov 3 ha əraziyə yayılıb.
Hazırda hadisə ilə əlaqədar günahkar şəxs və ya şəxslərin müəyyən edilərək məsuliyyətə cəlb olunması istiqamətində əməliyyat tədbirləri aparılır.
