Qusarlı taekvondoçu Fəridə Əzizova qızıl qazandığı İslamiadada yaşadıqları haqqında danışıb. Bu barədə ShimalNews 12 avqust tarixində Azərtac-a istinadən məlumat verir.
İdmançımız bildirib ki, Türkiyədə keçirilən 5-ci İslam Həmrəyliyi Oyunlarında Azərbaycanın aktivinə qızıl medal yazdırdığı üçün çox sevinir:
“Azərbaycan himni səslənəndə, göz yaşlarımı saxlaya bilmədim”.
Fəridənin rəqibləri İndoneziya, Mərakeş və İran idmançıları olub. O hesab edir ki, yarış çətin keçməyib. Taekvondoçumuz bundan öncə Bakıda təşkil edilmiş İslam Həmrəyliyi Oyunlarında daha güclü taekvondoçularla qarşılaşıb və gümüş medal qazanmışdır.
İdmançı bildirib ki, bundan sonra əsas hədəfi Olimpiya medalını qazanmaqdır: “Zədələndiyimə görə məşqlərdə tam gücümlə iştirak edə bilməsəm də, yarışda yüksək səviyyədə çıxış etməyi qarşıma məqsəd qoymuşdum. Məşqçilərimə söz vermişdim ki, mütləq medal qazanacağam. Hər zaman olduğu kimi hədəf qızıl medal idi. Çox sevinirəm ki, müəllimlərimin etimadını doğrulda bildim.
Qarşıda bizi mühüm yarışlar gözləyir. Bu il keçiriləcək Qran-Pri və dünya çempionatı, eləcə də 2024-cü ildə Bakıda təşkil olunacaq dünya çempionatına hazırlaşırıq. Əsas hədəf isə 2024-cü ildə baş tutacaq Paris Olimpiadasında yüksək səviyyədə çıxış etməkdir. Olimpiadada medal qazanmadan karyeramı yekunlaşdırmaq istəmirəm".
