Qusar Olimpiya İdman Kompleksində gənc mühəndislərin yay düşərgəsi start götürüb. Bu barədə ShimalNews 20 avqust tarixində Azərbaycan Milli Elmlər Akademiyasına (AMEA) istinadən xəbər verir.
Avqustun 23-dək davam edəcək yay düşərgəsinə ölkə üzrə müxtəlif regionlarda yerləşən elm və təhsil müəssisələrində çalışan gənc alim, mütəxəssis və mühəndislik ixtisası üzrə təhsil alan tələbələr cəlb olunacaq.
Düşərgə Gənclər və İdman Nazirliyi və AMEA Gənc Alim və Mütəxəssislər Şurasının birgə təşkilatçılığı ilə həyata keçirilir. Burada gənclər üçün “Mühəndislikdə nanotexnologiya”, “Yaşıl gələcək – bioplastik və bioyanacaqlar”, “İqlim dəyişiklikləri”, “Enerji sərfiyyatı və istifadəsinin təşkili”, “Fossil və qeyri-fossil mənbələrə əsaslanan texnologiya”, “Sənaye-4.0” mövzularında təlim, mühazirə, seminar, debat və ustad dərslərinin keçiriləcəyi bildirilib.
Artıq “Fövqəladə hallarda davranış qaydaları”, “İlk tibbi yardım” mövzularında əyani-praktik təlim keçirilib. Gün ərzində gənclərin asudə vaxtlarının səmərəli təşkili üçün “Theta healing” təlimi, meditasiya, intellektual və əyləncəli oyunlar təşkil olunub.
