Qusarın icra başçısı Şair Alxasov şəhid ailəsi və qazi ilə görüşüb. Bu barədə ShimalNews 17 avqust tarixində Qusar rayon İcra Hakimiyyətinə istinadən məlumat verir.
Ukur kəndində şəhid Orxan Əlimuradovun ailəsi ziyarət olunub. Görüşdə şəhidin ailə üzvləri, icra başçısı, rayonun hüquq-mühafizə orqanlarının rəhbərləri, Vətən müharibəsi iştirakçısı Kamran Mirzəquliyev iştirak ediblər.
Şəhid atası Roman Əlimuradovun həyətində yanğın baş vermişdir. Dövlət tərəfindən hadisənin fəsadlarının aradan qaldırılması üçün lazımi tikinti materialları verilməklə köməklik göstərilmişdir. Şair Alxasov yanğından sonrakı təmir işləri ilə tanış olub, həmçinin ailəni narahat edən digər məsələləri öyrənib.
Azərbaycan ordusunda müddətdən artıq xidmət edən Orxan Əlimuradov 2020-ci ildə Vətən Müharibəsində Cəbrayıl rayonu istiqamətində gedən döyüşlərdə şəhid olmuşdur. O, ölümündən sonra “Rəşadət” ordeni, “Kəlbəcərin azad olunmasına görə”, “Cəbrayılın azad olunmasına görə”, “Füzulinin azad olunmasına görə”, “Cəsur döyüşçü” və “Vətən uğrunda” medalları ilə təltif olunmuşdur.
Şəhidin böyük qardaşı Əlimuradov Cəmil Roman oğlu da hazırda Azərbaycanın Milli ordusunda xidmət edir.
