Qusarda Polis Akademiyasında təhsil almağa dair təşviqat aparılıb.
Daxili İşlər Nazirliyinin Mətbuat Xidmətindən Shimal.News-a verilən məlumata görə, yuxarı sinif şagirdləri və onların valideynləri ilə görüş baş tutub.
Tədbir rayon polis şöbəsinin inzibati binasında keçirilib. Burada çıxış edən polis əməkdaşları məktəblilərə sağlam həyat tərzinin təbliği, eləcə də onlarda vətənpərvərlik hissinin daha da yüksəldilməsi, xalqımızın tarixi keçmişi, ölkəmizdə yaradılan sabitlik, asayiş barədə danışıblar.
Ali təhsil almaq arzusunda olan abituriyentlərə Polis Akademiyası barədə ətraflı məlumat verilib. Akademiyaya kursant qəbulu qaydaları ilə bağlı abituriyentlərin suallarını cavablandıran polis polkovniki orada gənclərimizin hərtərəfli inkişafı üçün yaradılan müasir şərait, zəngin kitabxanalar, xarici dil kursları, laboratoriyalar, yataqxanalar, idman və atıcılıq yerləri, habelə asudə vaxtlarının səmərəli təşkili məqsədilə görülən işlərdən danışıb.
Sonda şagirdlərin sualları cavablandırılıb.
