Qusar Dövlət Ləzgi Dram Teatrı Bakıda “II 4.4 Qısa tamaşalar festivalı”na qatılıb. Bu haqda ShimalNews 29 noyabr tarixində Bizim.Media-ya istinadən məlumat verir.
Teatr kollektivinin baş rejissoru Əliyar Əliyev Musiqili Komediya Teatrının səhnəsində dramaturq Murat Kolqanata aid “Poni” əsərini səhnələşdirib. Əsərdə əsas mövzu insanların mənəvi azadlıq, ev və torpaq uğrunda apardıqları mübarizədir.
Baş qəhrəman Poni ruhlar dünyasına, Allahın mövcudluğuna uşaq sadəliyi ilə yanaşır. O, ağacda qoca kişinin yaşamasına, budaqlarda ruhların dolaşmasına çox inanır.
Rejissor Əliyar Əliyev əsərin və paytaxt səhnəsinin məsuliyyətini yaxşı anlayır. O deyir ki, bu bir təcrübədir. Aktyorlar böyük səhnənin iyini hiss edirlər.
Tamaşa haqqında münsiflər maraqlı fikir bildiriblər. Onlar düşünürlər ki, əyalət teatrı olan belə kollektivlərin festivallarda iştirak etmək cəsarəti alqışa layiqdir. Aktyorlar bu cür tədbirlərdən çox şey öyrənə bilərlər.
Festival noyabrın 30-na qədər davam edəcək.
