Qubanın təxminən 100 yaşı olan 2-ci Nügədi kənd 2 nömrəli tam orta məktəbi heç vaxt əsaslı təmir olunmayıb. Bu barədə ShimalNews 2 sentyabr tarixində TehsilBiz TV-yə istinadən məlumat verir.
Təhsil müəssisəsinin dam örtüyü uçub, döşəmənin taxtaları çürüyüb, pəncərələr isə sınıb. Bu səbəbdən məktəb təhlükə mənbəyinə çevrilib.
Məktəbin direktoru Əfqan Babaşov deyir ki, bina cari təmirlər hesabına qorunub saxlanılır. Onun sözlərinə görə, bu bina ötən əsrin 27-28-ci illərində sırf məktəb kimi tikilib.
Məktəb direktoru bildirib ki, regional təhsil idarəsi yeni yaranmış qurumdur. Bundan qabaq məsələ ilə bağlı Xaçmazın Ərazi Maliyyə Hesablaşma mərkəzinə, eləcə də Quba Rayon Təhsil şöbəsinə müraciət olunub.
Quba-Xaçmaz Regional Təhsil İdarəsinin müdiri Rüfət Hacıyev sözügedən məktəbin tikinti üçün perspektiv inkişaf planında olduğunu bildirib.
