Beynəlxalq Astronomiya İttifaqının (BAİ) qərarına əsasən kiçik planetlərdən birinə məşhur astrofizik alim, fizika-riyaziyyat elmləri namizədi Faiq Musayevin adı verilib.
Beynəlxalq Astronomiya İttifaqından Shimal.News-a bildirilib ki, kataloq nömrəsi 553035 olan asteroid 2011-ci il yanvarın 10-da Timur Kryaçko və Boris Satovski tərəfindən Zelençuk stansiyasında kəşf edilib. Hərəkət zonası Mars və Yupiter planetlərinin arasındakı asteroid qurşağı olan bu kiçik planet cari ilin birinci rübünədək şərti olaraq 2011 AM34 adlandırılıb.
Faiq Adil oğlu Musayev 19 avqust 1959-cu ildə Azərbaycan Respublikasının Quba rayonunda anadan olub. O, 1981-ci ildə Azərbaycan Dövlət Universitetinin (Bakı Dövlət Universiteti) Fizika fakültəsini bitirib və gənc mütəxəssis kimi Kosmik Tədqiqatlar İnstitutunda əmək fəaliyyətinə başlayıb.
1982-ci ildən Şamaxı Astrofizika Rəsədxanasında elmi işçi vəzifəsinə işə qəbul edilib. Burada uzun illər boyunca elmi fəaliyyətlə məşğul olmuş alim 1992-ci ildə dünyanın ən məşhur astrofizika mərkəzlərindən biri olan Rusiya Elmlər Akademiyasının Xüsusi Astrofizika Rəsədxanasında dissertasiya işini uğurla müdafiə edərək fizika-riyaziyyat elmləri namizədi elmi dərəcəsini alıb.
1995-ci ildən öz xahişi ilə Şamaxı Astrofizika Rəsədxanasından işdən çıxıb və həmin ildən Xüsusi Astrofizika Rəsədxanasında elmi fəaliyyətini davam etdirib. Faiq Musayev orada fəaliyyət göstərdiyi müddət ərzində teleskoplar üçün spesifik elektron işıqqəbuledicilərinin yığılması ilə bağlı böyük təcrübə qazanıb, optik cihazların yığılmasında yüksək kvalifikasiyalı eksperimentator-spektroskopist kimi özünü təsdiq edib. Onun Rusiya, Polşa, Bolqarıstan və Türkiyə kimi ölkələrin rəsədxanalarındakı teleskoplar üçün yığdığı cihazlar böyük müvəffəqiyyətlə sınaqdan keçib və özünü doğruldub. Alimin hazırladığı cihazlarda alınmış yüksəkkeyfiyyətli müşahidə materialları əsasında müxtəlif müəlliflər tərəfindən maraqlı nəticələr alınıb.
Qeyd edək ki, Faiq Musayevin Şamaxı Astrofizika Rəsədxanası ilə Xüsusi Astrofizika Rəsədxanası arasında əlaqələrin genişləndirilməsində, Rəsədxana teleskoplarında qurulan optik cihazların hazırlanmasında da xüsusi xidmətləri olub.
