Quba şəhərində yol nişanlarının quraşdırılması zamanı yaranan qarışıqlıq hələ də davam edir.
Sürücülər Shimal.News-a müraciət edərək bildiriblər ki, əvvəl bəzi ərazilərdə eyni yol nişanları təkrar quraşdırılırdı. Hazırda isə yeni nişanların köhnə nişanların arxasında gizlədilməsi halları müşahidə olunur ki, bu da sürücülər üçün çaşqınlıq yaradır.
Belə hallardan biri Həsən Əliyev küçəsi ilə Heydər Əliyev prospektinin kəsişməsində qeydə alınıb. Daha əvvəl burada "Stop" nişanı ilə yanaşı yük avtomobillərinin hərəkətini qadağan edən nişan mövcud idi. Hazırda isə yük avtomobilləri üçün qadağanedici nişan saxlanılıb, onun arxasında isə "Stop" və məcburi sağa hərəkət nişanları yerləşdirilib. Bu dəyişiklikdən əvvəl sürücülər sola — ASAN Xidmət istiqamətində hərəkət edə bilirdilər.
Sürücülərin sözlərinə görə, Azərbaycan Yerüstü Nəqliyyat Agentliyi (AYNA) tərəfindən həyata keçirilən bu yenilənmələr çaşqınlıq, vaxt itkisi və cərimələnmə riskini artırır.
Qeyd edək ki, bir müddət əvvəl AYNA Bakı–Şamaxı avtomobil yolunda təkrarlanan nişanlarla bağlı məsələyə aydınlıq gətirmişdi. Qurumdan bildirilib ki, yol nişanlarının quraşdırılması və sökülməsi müxtəlif qruplar tərəfindən icra edildiyi üçün bəzi ərazilərdə proses zamanı müvəqqəti təkrarlanma halları yarana bilər.
