Xaçmaz şəhərinin bəzi ərazilərində elektrik enerjisinin verilişində fasilə yaranıb.
Bu barədə Shimal.News-a şəhər sakinləri məlumat veriblər. Bildirilir ki, artıq iki saata yaxındır şəhərin bir hissəsinin elektrik enerjisi ilə təminatında problem ortaya çıxıb. Nəticədə bəzi küçələrdə işıqforlar da fəaliyyətini dayandırıb.
Elektrik kəsintisi ticarət obyektlərinin fəaliyyətinə iflic edib. Mağaza sahibləri bildirirlər ki, şəhərin həmin hissəsində elektrik enerjisinin verilişində fasilələr tez-tez baş verir:
"Bu tərəflərdə, N.Nərimanov küçəsində və Heydər Əliyev prospektində demək olar ki, tez-tez bu problem olur. Kimin generatoru var, qoşur işini davam edir, kimin yoxdursa qaranlıqda gözləyir. Mal da sata bilmirik, içəri girən olmur. Çünki hər şey elektrik enerjisindən asılıdır – işıqlandırma da, istilik də".
Sakinlər problemi kökündən aradan qaldırmaq üçün aidiyyəti qurumların tədbir görmələrini gözləyirlər.
