Balakən rayonunda baş verən bıçaqlanma hadisəsi ilə bağlı məhkum olunmuş şəxsin kassasiya şikayətinə Ali Məhkəmədə baxılıb.
Pravda.az-ın məlumatına görə, hakim Teyyub Muxtarovun sədrliyi ilə keçirilən iclasda şikayət təmin edilməyib və əvvəlki məhkəmə qərarı qüvvədə saxlanılıb.
İttihama əsasən, hadisə 2024-cü il oktyabrın 1-də Balakən rayonunun Kortala kəndində yerləşən "Ruslan" şadlıq sarayının həyətində baş verib. Alkoqollu vəziyyətdə olan Səlim Kərəmli (adı şərtidir) həmkəndlisi ilə mübahisə zamanı ona hücum edib və zərərçəkmiş şəxs ağır xəsarətlər alıb. Məhkəmə-tibbi ekspertizası həmin xəsarətlərin həyat üçün təhlükəli ağır zərər olduğunu müəyyən edib.
Şəki Ağır Cinayətlər Məhkəməsinin hökmü ilə Səlim Kərəmli 2 il 11 ay 29 gün müddətinə azadlıqdan məhrum edilib. Apellyasiya instansiyası kimi, Ali Məhkəmə də hökmü dəyişmədən saxlayıb.
