Kənd Təsərrüfatı Nazirliyinin təşkilatçılığı ilə Qubada toxum sərgi-satış yarmarkası keçiriləcək. Bu barədə ShimalNews 23 avqust tarixində məlumat verir.
Tədbir sabah Nizami parkında baş tutacaq. Artıq ərazidə hazırlıq işlərinə start verilib, çadırlar və bannerlər quraşdırılır.
Yarmarkada Aqrar Xidmətlər Agentliyinin müvafiq qurumları, Aqrar Kredit və İnkişaf Agentliyi, “Aqroservis” ASC, Dövlət Toxum Fondu, Azərbaycan Toxumçular Assosiasiyası, yerli toxum istehsalçıları, elmi-tədqiqat institutları, toxum istehsalı və satışı ilə məşğul olan şirkətlər və fermerlər iştirak edəcəklər.
Bu kimi yarmarkaların keçirilməsində əsas məqsəd toxum bazarının formalaşması, “seleksiyaçı-toxumçu-istehlakçı” zəncirlərinin real qarşılıqlı əlaqəsinin qurulması, işgüzar və səmərəli görüşlərin keçirilməsi, həmçinin fermerlər üçün sertifikatlı toxumların əlçatanlığının təmin olunmasıdır.
