Quba rayonunda "Şəhidlər unudulmur" adlı tədbir keçirilib. Bu barədə ShimalNews 25 avqust tarixində Xaçmaz Regional Mədəniyyət İdarəsinə istinadən xəbər verir.
Tədbir Zərdabi qəsəbəsinin kitabxana filialında baş tutub. Mərasim Vətən müharibəsi şəhidi, leytenant Səttər Piriyevin xatirəsinə həsr olunub. Tədbirdə iştirak edən gənclər şəhidimizin xatirəsini hörmətlə anıblar. İştirakçılara igidimizin müharibə zamanı etdiyi qəhrəmanlıqlardan danışılıb.
Səttər Piriyev 25 oktyabr 1998-ci ildə Qubanın Zərdabi qəsəbəsində anadan olub. İgidimiz Zərdabi qəsəbəsi tam orta məktəbdə, Cəmşid Naxçıvanski adına Hərbi Liseydə, daha sonra isə Heydər Əliyev adına Azərbaycan Ali Hərbi Məktəbində təhsil alıb.
Leytenant rütbəsində olan Piriyev Vətən müharibəsi zamanı Cəbrayılın, Füzulinin, Qubadlının və Xocavəndin azadlığı uğrunda gedən döyüşlərdə savaşıb. Xocavənd rayonu istiqamətində gedən döyüşlərdə bölmələrin mühasirədən, həmçinin yaralıları döyüş meydanından çıxarılmasında iştirakı böyük olub.
Səttər Piriyev noyabrın 7-də Xocavənd döyüşləri zamanı "Qızılqaya" və "Üçtəpə" adlandırılan ərazilər istiqamətində şəhid olub.
Qəhrəmanımız ölümündən sonra "Vətən uğrunda", "İgidliyə görə", "Xocavəndin azad olunmasına görə" medalları ilə təltif edilib.
