Quba rayonu, Amsar kəndində yerləşən 11 saylı uşaq bağçasında tərbiyəçi tərəfindən azyaşlıya qarşı zorakılıq göstərilməsi ilə bağlı narazılıq yenidən gündəmə gəlib.
Shimal.News redaksiyasına daxil olan şikayətdə valideyn iddia edir ki, 2023-cü ilin dekabr ayında övladı yemək yemədiyi üçün bağçanın əməkdaşı tərəfindən zorakılığa məruz qalıb. Onun sözlərinə görə, tərbiyəçi uşağın ağzını maşa ilə yandırıb.
Valideyn bildirir ki, hadisədən dərhal sonra müvafiq təhsil qurumlarına müraciət edib, lakin cavab əvəzinə təzyiqlərlə üzləşib. İddia olunur ki, məsələni araşdırmaq əvəzinə, şikayəti geri götürməyə sövq edilib.
Şikayətçinin sözlərinə görə, hadisədən xeyli vaxt keçsə də, həmin əməkdaş – dayə Ülkər Şıxəmirova hələ də bağçada fəaliyyətini davam etdirir. Valideyn əlavə edir ki, bu ilin aprelində bağçaya növbəti səfərində də həmin şəxslə qarşılaşıb və yenidən etikadan kənar münasibətlə üzləşib.
Məsələ ilə bağlı Quba-Xaçmaz Regional Təhsil İdarəsinin Shimal.News-a göndərdiyi rəsmi cavabda bildirilir ki, yayılan görüntülər və iddia olunan hadisə 2023-cü ilə aiddir. Valideynin müraciəti əsasında aparılan araşdırma zamanı zorakılıq faktı təsdiqini tapmayıb və bu barədə valideynə rəsmi məlumat verilib.
Qurum qeyd edir ki, yaxın zamanda valideynlə sözügedən dayə arasında yenidən mübahisə baş verib. Müəssisə rəhbərliyi tərəfindən dayəyə əmək funksiyalarını lazımi qaydada yerinə yetirmədiyinə görə yazılı xəbərdarlıq olunub.
Təhsil İdarəsi onu da əlavə edib ki, məktəbəqədər təhsil müəssisələrində azyaşlıların sağlamlığı və təhlükəsizliyi nəzarətdə saxlanılır, müraciətlərə operativ və həssas yanaşılır, araşdırmalar zamanı aşkar edilən nöqsanlarla bağlı qanunvericiliyə uyğun tədbirlər görülür.
