“Aqrar Məsləhət Xidmətlərinin Gücləndirilməsi” layihəsi çərçivəsində Quba və Xaçmaz fermerləri üçün genderə həssas məsləhət təlimləri baş tutub. Bu barədə ShimalNews 18 avqust tarixində BMT-nin Ərzaq və Kənd Təsərrüfatı Təşkilatının (FAO) Azərbaycan nümayəndəliyinə istinadən məlumat verir.
Bu layihə Avropa İttifaqının maliyyə dəstəyi ilə həyata keçirilib. Burada Qubanın Alekseyevka və Zərdabi, Xaçmazın isə Hacıəlibəy və Sayad kəndlərindən olan 100-dək fermer (60 nəfərdən çox qadın fermer) iştirak edib. Onlar alma, gavalı, gilas və pomidor bitkiləri üzrə yaradılan Aqrar Məsləhət Platformalarının üzvləridir.
Müzakirələr zamanı hər bir məhsul üzrə dəyər zənciri barədə məlumat verilib. Eləcə də toxumun əkilməsindən hazır məhsulun bazara çıxarılmasına qədər proses təhlil olunub. Bu zaman bildirilib ki, Azərbaycanda istehsal olunan almanın 72.2%-i, gilasın 45%-i, gavalının isə 31%-i Quba-Xaçmaz zonasının payına düşür.
Genderə həssas təlimlərin keçirilməsində məqsəd qadın fermerlərin aqrar məsləhət xidmətlərindən istifadəsini əlçatan etməkdir.
