Quba və Qusar rayonlarının ümumtəhsil müəssisələrinin ibtidai sinif müəllimləri təhsilverənlərin sertifikatlaşması prosesi haqqında maarifləndiriliblər. Bu barədə ShimalNews 10 avqust tarixində Azərtac-a istinadən məlumat verir.
Tədbir Qubada təşkil olunub. Burada Təhsil İnstitutunun Metodik Dəstək və Peşəkar İnkişaf Mərkəzinin direktoru Nəzakət Mehdiyeva çıxış edib. O, sertifikasiyanın qiymətləndirmə çərçivəsini şərh edib, imtahanın məzmunu və təşkili qaydaları ilə bağlı ətraflı məlumat verib. İbtidai sinif müəllimlərinə sertifikatlaşdırma prosesinin təhsilin keyfiyyət göstəricilərinə, təhsilverənlərin karyera inkişafına müsbət təsirləri barədə danışılıb.
Daha sonra Quba-Xaçmaz Regional Təhsil İdarəsinin Tədrisin keyfiyyəti sektorunun müdiri Qələmşah Dostuyev, Qusar rayonu üzrə təhsil sektorunun müdiri Nairə Kliçova, Quba rayonu üzrə təhsil sektorunun müdiri Pərviz Nurməmmədov da çıxış ediblər.
Görüş müzakirə və sual-cavab formatında davam edib. Müəllimləri maraqlandıran suallar cavablandırılıb.
