Qubanın Haput kənd sakinləri hər il sentyabr ayında köçə başlayırlar. Bu barədə hazırlanan reportajı ShimalNews 7 sentyabr tarixində Bizim.Media-ya istinadən verir.
Haputlu (kəndin adı əvvəllər Haput olub. Daha sonra Milli Məclisin qərarı ilə o, Haputlu adlandırılıb) kəndi Qubanın rayon mərkəzindən 42 km aralıda yerləşir. Cənubdan İsmayıllı, qərbdən Xınalıq, cənub-şərqdən isə Adur kəndi ilə həmsərhəddir. Kənddə 593 sakin və 71 təsərrüfat var. Kənd camaatı köçəri həyat tərzi sürür. Onlar, əsasən, maldarlıqla məşğul olurlar. Qışda sakinlər mal-qara ilə Şirvan zonasına üz tuturlar, kənddə isə ən çoxu 10-12 evdə yaşayış davam edir. Sentyabrın sonlarında yenə köç başlayacaq. Yayda isə Quba yaylaqlarına geri qayıdış olur.
Haputlular Qubada yaşayan milli azlıqlardan biridir. Onlar kompakt olaraq Qubanın Haputlu və onun cənub sərhədində yerləşən İsmayıllı rayonunun Mollaisaqlı və Hacıhətəmli kəndlərində məskunlaşıblar.
Kənddə təbii qaz yoxdur. Sakinlər payız-qış aylarında yanacaq kimi mal təzəyindən və gərmə adlanan qoyun peyinindən istifadə edirlər.
Qonaqpərvərliyi ilə seçilən ölkəmizin digər ərazilərində olduğu kimi, Haputlu sakinləri də qonaqları istiqanlılıqla qarşılayırlar.
Kəndə gələnlərə yerli əhali "Qum" adlandırdığı ən hündür təpəyə qalxmağı məsləhət görür. Dəniz səviyyəsindən 2000 metr yüksəklikdə yerləşən bu məkandan kənd “ovucun içində” görünür. Yaşayış məkanının dörd tərəfdən dağlarla əhatə olunması ona xüsusi gözəllik bəxş edir.
[caption id="attachment_23894" align="alignnone" width="300"]
Foto Bizim.Media[/caption]
