Quba rayon sakininin mərkəzi xəstəxanaya qarşı narazılığı ilə bağlı açıqlama verilib. Bu barədə ShimalNews 19 avqust tarixində Oxu.az-a istinadən məlumat verir.
Vətəndaş Anar Baxışovun sözlərinə görə, atası Nizami Baxışov avqustun 17-də özünü pis hiss etdiyi üçün Quba Rayon Mərkəzi Xəstəxanasının (RMX) təcili tibbi yardım şöbəsinə çatdırılıb:
“Qəbul şöbəsində Kamran həkimin gəlməsi üçün bir müddət gözləməli olduq. Gəldikdən sonra o, valideynimə sistem qoşulmasının lazım olduğunu bildirdi və mənə dərmanları özümüzün almalı olduğumuzu dedi.
“Niyə biz alırıq ki? Xəstəxanada dərman yoxdur?” deyə bildirdim. Kamran həkim kəskin şəkildə Tibbi Ərazi Bölmələrini İdarəetmə Birliyinin (TƏBİB) onlara dərman vermədiyini qeyd etdi”.
Məsələ ilə bağlı Quba RMX-dən cavab olaraq bildirilib ki, Baxışov Nizami Məmməd oğlu 17.08.2022-ci il tarixində saat 20:22-də təcili tibbi yardım şöbəsinə müraciət edib:
“İlkin müayinə zamanı vətəndaşın vəziyyətinin stabil olduğu təsbit edilib və ambulator müalicə təyin edilib. Daha sonra vətəndaşın oğlu tərəfindən atasına təcili olaraq sistem köçürülməli olduğu əsas gətirilib, lakin müayinə həkimi tərəfindən N.Baxışovun hemodinamik göstəricilərinin stabil olduğu və bu səbəbdən də infuziyaya ehtiyac duyulmadığı vurğulanıb. Qeyd edək ki, şikayətdə əks olunan digər iddialar həqiqəti əks etdirmir”.
