Qubada fəaliyyət göstərən restoranlardan biri su anbarını qurutmaq istədiyinə görə cərimələnib. Bu barədə ShimalNews 10 avqust tarixində Bakıvaxtı.az-a istinadən məlumat verir.
"Əmlak Məsələləri Dövlət Xidməti tərəfindən araşdırma aparılan zaman Quba rayonu, 2-ci Nügədi kəndi ərazisində yerləşən “Bulaqdərə” su anbarının yerləşdiyi torpaq sahəsinin ƏMDX ilə bağlanmış icarə müqaviləsi əsasında “Macara Club Tourism, Hospitality and Management” MMC adlı hüquqi şəxs tərəfindən icarə müqaviləsinin şərtlərini pozaraq istifadə edildiyi müəyyən olunub", - Əmlak Məsələləri Dövlət Xidməti bildirib.
Bildirilib ki, həmin hüquqi şəxs tərəfindən torpaq daşınaraq anbarın su ilə örtülü ərazisinin doldurulması işlərinin aparılması faktı aşkar edilib. Bununla bağlı hüquqi şəxsin nümayəndəsinə torpaq qanunvericiliyinin tələbləri barədə məlumat verilib, qeyri-qanuni görülən işlərin dayandırılması barədə xəbərdarlıq olunub. Eləcə də İnzibati Xətalar Məcəlləsinin müvafiq maddəsinə uyğun protokol tərtib edilib, müvafiq tədbirlərin görülməsi məqsədilə Ekologiya və Təbii Sərvətlər Nazirliyinə məktub göndərilib.
