Qubanın Digah kəndində yeni məktəb binasının tikintisinin son mərhələsi həyata keçiriləcək. Bu barədə 7 sentyabr tarixində ShimalNews Az TV-yə istinadən məlumat verir.
98 il öncə inşa edilən məktəb hazırda əsaslı təmir edilir. Təhsil müəssisəsi son illər istifadəyə yararsız vəziyyətə düşmüşdür. Layihə çərçivəsində məktəb müasir kompüter otaqları, kitabxana və yeməkxana, istilik və işıqlandırma sistemi ilə təchiz ediləcək.
“Hal-hazırda tikintinin sonuna yaxın bir hissəsindəyik. Betonlama və armaturlama işləri görülüb, hörgü yekunlaşıb. Həmçinin suvaq və alçı işləri də bitib. Elektrik və santexnik işləri də yekunlaşmaq üzrədir”, - deyə iş icraçısı Sahil Məmmədov bildirib.
Digah kəndi ilə yanaşı Şimal rayonlarında 1800-ə yaxın şagird təhsil ala biləcəyi daha 4 yeni məktəb binası inşa olunur. Belə ki, Qubanın 2 kəndində - Qələdüzdə 132, Qənərçayda isə 56 şagird yerlik modul tipli məktəblər quraşdırılır.
Daha öncə, Digah kəndindəki məktəbin inşasının cari ilin oktyabr ayında yekunlaşmasının planlaşdırıldığı bildirilmişdir.
