Oğuz rayonunda bir sakin iddia edir ki, həyətinin yaxınlığından keçən su arxı tez-tez daşaraq ərazisini su altında qoyur.
Məsələ ilə bağlı Shimal.News-a danışan sakinin sözlərinə görə, həmin su arxı Oğuz şəhərinin yuxarı hissəsindən başlayaraq şəhər ərazisində yağış sularının maneəsiz ötürülməsi üçün qazılıb.
“Arxın “Afra” hotel ərazisindən keçən hissəsində divarlar arxın qarşısını kəsir. Orada qoyulan suötürücü boru isə suyun axınını tam təmin edə bilmədiyindən, arx daşaraq həyətləri su altında qoyur”,- deyə o bildirib.
Şikayətçi onu da qeyd edib ki, məsələ ilə bağlı dəfələrlə hotel rəhbərliyinə müraciət etsə də, müraciəti cavabsız qalıb.
Bununla bağlı sözügedən hotellə əlaqə saxladıq. Hotel rəhbərliyindən bildirildi ki, qonşu həyətindən onların tərəfinə boru keçir və yağış yağarkən həmin borular zir-zibillə dolur.
“Borular zibillə dolur, qonşu isə onları təmizləmir. Biz nə edə bilərik, həyətlərinə bir işçi göndərim ki, borunu təmizləsinlər?! Üstəlik, bu məsələ bizim məsuliyyətimizdə deyil. Çünki biz öncədən Su İdarəsi ilə məsləhətləşərək 300 millimetrlik boru çəkmişik. Yenə də əlavə boru çəkməyə hazıram, amma qonşuluqda yaşayan sakin həyətindəki zir-zibili təmizləmədikdən sonra biz nə edə bilərik”, - deyə hotel rəhbərliyi qeyd edib.
