Zaqatala rayonunda qeyri-adi hadisə yaşanıb.
Qafqazinfo.az-ın məlumatına görə, mobil tətbiqi vasitəsilə taksi sifariş edən 38 yaşlı kişi məhkəməlik olub.
Məlumata görə, Qazangül qəsəbəsində yaşayan, Ağdamdan məcburi köçkün olan E.Quliyev sərxoş vəziyyətdə evinə getmək üçün taksi çağırıb. Yolda o, sürücü ilə mübahisə edib.
Sərnişinin aqressiv davranışını və sərxoşluğunu görən sürücü avtomobili saxlayaraq onun düşməsini tələb edib. Lakin E. Quliyev taksidən enməkdən imtina edib. Bunun üzərinə sürücü avtomobili birbaşa Zaqatala Rayon Polis Şöbəsinin qarşısına sürüb.
Polis şöbəsinin qarşısında da sərnişin sakitləşməyib, söyüş söyərək xuliqanlıq edib. Hadisə yerinə gələn polis əməkdaşları tərəfindən E. Quliyev saxlanılıb və barəsində inzibati protokol tərtib edilib.
Zaqatala Rayon Məhkəməsinin qərarı ilə o, 50 manat məbləğində cərimə olunaraq sərbəst buraxılıb.
