Kəlbəcərdə minaya düşən Qusar rayon sakinləri danışıblar. “Düşmənin minası bizi qorxuda bilməz, müalicəmiz bitdikdən sonra yenidən öz işimizə qayıdacağıq”, - deyə onlar bildiriblər. Bu haqda ShimalNews 16 dekabr tarixində Apa-ya istinadən məlumat verir.
"Biz heç nədən qorxmuruq. Mən sağalmağımı gözləyirəm, yenidən gedib həmin ərazidə öz işimi görəcəm. Ermənilər kim olub ki, biz onlardan qorxaq? Mən bir neçə aydır Kəlbəcərin ərazisində işləyirəm. Birinci dəfədir başıma belə iş gəlib. Çox şükürlər olsun, sağ-salamat qurtardım. Sağ olsun Ali Baş Komandan, hər zaman Azərbaycan xalqının yanındadır. Bu gün də hər kəs bizə diqqət və qayğı göstərir", - deyə traktor mexanizatoru, 53 yaşlı Rodik Pənahov bildirib.
Minaya düşən digər şəxs, 26 yaşlı Sadir Əliyarov: "Həmin gün saat 5 olardı, dirək basdırmağa çıxmışdıq. Orada traktor minaya düşdü. Onlara kömək edəndə bizim maşın da minaya düşdü. Partlayış nəticəsində, təəssüflər olsun ki, 1 hərbçimiz şəhid oldu. Mən də ayağımdan qəlpə yarası aldım. 2 aydır həmin ərazidə rabitə işləri ilə məşğul idik, həmin yolu getməmişdik. Hadisə baş verən vaxt ora getməli idik. Çünki dirək basdırmalı idik. Hazırda vəziyyətim yaxşıdır, səhhətimdə hər hansı bir narahatlıq yoxdur”.
Həkim Samir Məhərrəmov xəsarət alan şəxslərin vəziyyətlərinin hazırda normal olduğunu deyib.
Daha öncə Kəlbəcər rayonunun Çıraq kəndi ərazisində 8 nəfərin minaya düşməsi haqqında məlumat vermişdik.
