Xəbər verdiyimiz kimi, Xaçmaz rayonunun Ağtala kənd ümumi orta məktəbinin binası uzun illərdir qəzalı vəziyyətdədir. Son günlərdə yağan aramsız yağışlar məktəbin vəziyyətini daha da ağırlaşdırıb.
Bu barədə Shimal.News-a məlumat verən valideynlər bildiriblər ki, 200-dən çox şagird təmirsiz binada, qışda soyuq şəraitdə, yağışlı havalarda isə su içində dərs keçmək məcburiyyətində qalır.
Valideynlərin sözlərinə görə, aramsız yağan yağışlar nəticəsində məktəbin tavanı da zədələnib.
Təhsil ocağındakı bu vəziyyətə görə bəzi valideynlər övladlarını dərsə göndərmək istəmir. Onlar uşaqlarının sağlamlığından narahat olduqlarını bildirirlər.
Qeyd edək ki, məktəbin həm daxili, həm də xarici hissəsi uzun müddətdir təmir olunmayıb.
