Bölgələrdə heyvan bazarlarının bağlanması sakinlərin narazılığını artırır.
Shimal.News xəbər verir ki, fermerlər artıq bazara məhsul çıxara bilmədikləri üçün çətinliklərlə üzləşdiklərini bildirirlər:
"Yem almağa belə pulumuz yoxdur. 1 aydır ki, hər şeyi nisyə şəkildə əldə edirik".
Qeyd edək ki, Göygöl, Daşkəsən, Samux eləcə də qərb bölgəsində heyvandarlıqla məşğul olan insanların üz tutduqları məkan eynidir, yəni söhbət Göygöl mal bazarından gedir. Ərazisi təxmini 20 hektardan çox olan bu bazarda bir aya yaxındır satış dayandırılsa da, AQTA-nın göstərişinə əsasən, bazarda yenidənqurma işləri aparılır.
Bəs, bərpa işləri nə yerdədir?
Ərazi üzrə nümayəndənin sözlərinə görə, yenidənqurma işləri yekunlaşır:
"Həmin yerdə hər şey təzələnib, yola da asfalt çəkilir. Müasir kəsim məntəqəsi də yaradılıb".
Məsələ ilə bağlı AQTA-dan bildirildi ki, fəaliyyəti müvəqqəti dayandırılan bazarlarda yenidənqurma və sanitar-gigiyenik tələblərə uyğunlaşdırılma prosesi davam edir. Uyğunsuzluqların aradan qaldırılması və agentliyin yekun qiymətləndirilməsindən sonra onların fəaliyyətinə icazə veriləcəkdir. Tələblərə cavab verməyən bazarlar isə açılmayacaq.
