Xaçmazın fındıq bağlarda məhsuldarlıq çoxalıb.
ShimalNews Azərtac-a istinadən məlumat verir ki, avqustun əvvəllərindən təsərrüfatçılar fındıq yığmağa başlayıblar. İndi məhsul toplama dövrünün ən qızğın vaxtıdır. Bu günə qədər 5 min tondan çox fındıq toplanıb. Məhsul yığımı ilə yanaşı, fındıq qabıqdan təmizlənir və qurudulur. Təsərrüfatçılar qabıqdan təmizləmə üçün xüsusi aqreqatlardan istifadə edirlər. Bu da onların işini asanlaşdırır.
Hazırda fındığın kiloqramı təsərrüfatçılardan 3 manata alınır. Təsərrüfatçı Elşad İsmayılov yığımın sentyabrın ortalarına qədər davam edəcəyini qeyd edir.
“Fındıq bağlarında məhsulu vaxtında toplamaq üçün fəhlələr cəlb olunur. Fındığın bir kiloqramını 50 qəpiyə yığırlar. Məhsul vaxtında toplanmasa, ağacların dibinə tökülür, itki çoxalır. Hazırda fındıq 2,8-3 manata satılır. Amma biz məhsulu toplayıb, anbarda saxlayacağıq. Payız-qış aylarında qiymət daha sərfəli olur. Ötən il dekabr ayında kiloqramını 5 manata satmışıq ”, - deyə təsərrüfatçı vurğulayıb.
