Fövqəladə Hallar Nazirliyinin Şimal Regional Mərkəzində “Heydər Əliyev İli”nə həsr olunmuş “Gənc xilasedici və yanğınsöndürən” X Ümumrespublika yarışlarının zona birinciliyi keçirilib. Bu barədə ShimalNews 14 aprel tarixində adıçəkilən quruma istinadən məlumat verir.
Birinciliyin keçirilməsində əsas məqsəd şagirdlərin fövqəladə hallara hazırlığın, fiziki və intellektual səviyyəsinin yoxlanılması, məktəblilərdə şəxsi və ictimai təhlükəsizliyə məsuliyyətli yanaşma hissinin artırılması və gənc nəslin nümayəndələrinə sağlam həyat tərzinin aşılanmasından ibarət olub.
Yarış “Kombinə edilmiş yanğın estafeti”, “Maneələr zolağı” və “Gənc ekspertlər” adlı 3 mərhələdən ibarət olub.
Yekunlara əsasən, Quba rayonu Qaraçay kənd tam orta məktəbinin komandası I yerə, Qusar şəhəri 6 saylı tam orta məktəbin komandası II yerə, Siyəzən rayonu Böyük Həmyə kənd tam orta məktəbinin komandası isə III yerə layiq görülüb.
Qalib komanda “Gənc xilasedici və yanğınsöndürən” yarışlarının respublika birinciliyində iştirak etmək hüququ qazanıb.
