Balakən rayonunda arıçıların arıxanalarına gedən yolun bir hissəsi güclü sel nəticəsində dağılıb.
Hazırda rayonda 44 min arı ailəsi var və bu sahə ilə 1200-dən çox insan məşğul olur.
Arıçılar əsasən yazın əvvəlində arı ailələrini Zaqatala Dövlət Təbiət Qoruğunun Katex kəndi istiqamətində yerləşən yüksək dağlıq ərazilərinə aparırlar.
Lakin iyulun 7-8-də yağan güclü leysan yağışlarından sonra Katexçayda yaranan sel arıxanalara gedən yolun 60-70 metrlik hissəsini dağıdıb. Nəticədə texnikaların hərəkəti məhdudlaşıb.
Balakən Rayon Arıçılar Birliyinin sədri Elvin Hüseynov bildirib ki, artıq bal süzümü başa çatmaq üzrədir. Lakin arıçılar arıxanalara gedə bilmədikləri üçün arı ailələrinə lazımi qulluq göstərməkdə çətinlik çəkirlər. Bu isə xəstəliklərin yayılması riskini artırır.
Katex bələdiyyəsindən bildirilib ki, rayon rəhbərliyi əraziyə baxış keçirib və problemin həlli ilə bağlı aidiyyəti qurumlar qarşısında məsələ qaldırılıb.
Ekologiya və Təbii Sərvətlər Nazirliyindən isə bildirilib ki, ərazi xüsusi mühafizə olunan təbiət ərazisidir. Buna görə burada hər hansı müdaxilə qanunvericiliyin tələblərinə uyğun aparılmalıdır. Hazırda məsələ Balakən Rayon İcra Hakimiyyəti və Bioloji Müxtəlifliyin Qorunması Xidməti ilə birgə nəzərdən keçirilir və alternativlər qiymətləndirilir.
Mənbə: Azərtac
