Sertifikasiya imtahanında ən yüksək nəticə göstərən Qusar müəllimləri təhsil nazirinə xahiş ünvanlayıblar. Bu barədə ShimalNews 1 sentyabr tarixində Bizim.Media-ya istinadən məlumat verir.
Samirə Məmmədova və Səidə Bağışova imtahanlarda 60 bal toplayıblar. Onlar nazir Emin Əmrullayevdən çalışdıqları təhsil ocaqları üçün elektron (ağıllı) lövhə göndərməsini xahiş edirlər.
Qusar şəhər şəhid B.Ağaverdiyev adına 1 saylı orta məktəbin ibtidai sinif müəllimi Samirə Məmmədovanın sözlərinə görə, belə bir lövhə olsa, bu, tədrisin daha keyfiyyətli və səmərəli aparılmasına kömək edər.
Urva kənd tam orta məktəbinin ibtidai sinif müəllimi Səidə Bağışova həmkarının təklifini dəstəkləyib:
“Bizim kənd məktəbinə də belə elektron lövhə hədiyyə verilsə, çox sevinərik. Kənd şəraitində elektron lövhə olması çox vacibdir. Bu, dərslərin daha məzmunlu və əhatəli olmasına şərait yaradar”.
Səidə müəllimə söylədi ki, təhsil naziri bu təklifi müsbət dəyərləndirsə, çox şad olar:
“Mənim heç kompüterim belə yoxdur. İmtahanlara mobil telefonumla hazırlaşmışam. Məktəbdə elektron lövhə olsa, mənə və həmkarlarıma dərsin gedişi də asan olar”.
