Aztəminatlı ailələrdən olan gənclər təhsil krediti üçün müraciət edə bilərlər. Bu haqda 13 iyun tarixində ShimalNews məlumat verir.
Belə ki, Təhsil Tələbə Krediti (TTK) ödənişli və əyani təhsil alan tələbələrə və abituriyentlərə verilir. TTK-nın 2 növü var: sosial və standart.
Sosial kredit 2 faizlə verilir. Bu krediti almaq üçün aşağıdakı şərtlərin biri tələbəyə aid olmalıdır:
- ünvanlı dövlət sosial yardımı alan ailələrin üzvləri,
- 3-cü dərəcə əlilliyi olanlar.
Hər iki valideyni (tək valideyn olduqda həmin şəxs) aşağıdakı hallardan birinə aid olduqda:
- 1-ci və ya 2-ci dərəcə əlilliyi olduqda,
- işsiz kimi qeydiyyatda olduqda,
- yaşa görə əmək pensiyası aldıqda,
- yaşa görə sosial müavinət aldıqda,
- ailə başçısını itirməyə görə pensiya alan ailənin üzvləri,
- "Müharibə Veteranı" adı almış tələbələr.
Standart TTK isə 6 faizlə verilir. Müraciət etmək üçün abituriyent minimum 250 bal toplamalıdır. Kredit almaq üçün tələbə aşağıdakı şərtlərin hamısına aid olmalıdır:
- ümumi orta müvəffəqiyyət göstəricisi (ÜOMG) 71 bal və yuxarı olmalı;
- illik təhsil haqqının 20 faizini özü ödəməli;
- sosial TTK almaq hüququ olmamalıdır.
Müraciət etmək istəyən şəxslər notarial qaydada təsdiqlənmiş icazə ərizəsi almalı və ərizə nömrəsi ilə
e-ttkf.edu.az portalından qeydiyyatdan keçməlidirlər. Ərizəni Notarius ofisdən, ASAN xidmətdən və ya mobil notariat tətbiqindən əldə etmək mümkündür.
TTKF-dən təhsil tələbə krediti almış tələbələrin ölkədən çıxışına heç bir məhdudiyyət qoyulmur. Kreditin geri ödənişi təhsil müddəti bitdikdən 2 il sonra başlayır.
Ətraflı məlumat üçün 146-5 və ya 077-317-88-52 müraciət edə bilərsiniz.
