2024-cü ilin may ayında Şəkinin Baş Şabalıd kəndində baş verən qanlı hadisə ilə bağlı məhkum olunan Namiq Məmmədovun kassasiya şikayəti Ali Məhkəmədə araşdırılır.
Pravda.az-ın məlumatına görə, o, torpaq sahəsində mal-qaranın otarılması üstündə yaranan mübahisə zəminində 1966-cı il təvəllüdlü Azər Sədi oğlu Sədiyevi və 1957-ci il təvəllüdlü İsrafil Əhmədiyyə oğlu Məmmədsoyu odlu silahla qətlə yetirməkdə təqsirləndirilir.
İttihama əsasən, mübahisəyə əvvəlcə Azər Sədiyev, daha sonra isə İsrafil Məmmədsoy qoşulub. Gərginlik nəticəsində Namiq Məmmədov hər iki şəxsi güllələyərək öldürüb.
Şəki Ağır Cinayətlər Məhkəməsinin hökmü ilə Namiq Məmmədov 20 il müddətinə azadlıqdan məhrum edilib. Hökmə əsasən, cəzanın ilk 5 ili ümumi rejimli həbsxanada, qalan 15 ili isə ciddi rejimli cəzaçəkmə müəssisəsində çəkiləcək.
Təqsirləndirilən şəxs apellyasiya instansiyasına müraciət etsə də, Şəki Apellyasiya Məhkəməsi onun şikayətini təmin etməyib.
Hazırda Namiq Məmmədovun kassasiya şikayəti Ali Məhkəmənin hakimi Ələsgər Novruzovun sədrliyi ilə araşdırılır.
