Zaqatalada pul tapmayan kişi bibisinin evini qarət edib.
Shimal.News-un məlumatına görə, hadisə rayonun Çökəkoba kəndində qeydə alınıb.
İttihama görə, 1995-ci ildə Zaqatala rayonunun Kebeloba kəndində doğulmuş Kazım adlı şəxs dostu ilə birgə tanışı Asifdən 2200 manat borc alıblar. Dostlar bildiriblər ki, pulu bir ay müddətində qaytaracaqlar. Hadisədən bir ay keçsə də, dostlar həmin pulu qaytara bilməyiblər. Kazım götürdüyü pulun 100 manatını qaytarsa da, digər hissəsini tapa bilmədiyi üçün Asifdən daha bir ay vaxt istəyib. Asif isə nə Kazıma, nə də onun dostuna vaxt verməyərək onlardan pulu qaytarmalarını tələb edib. Borc sahibi dostlara pulu qaytarmağın "yolu"nu da göstərib. Bildirib ki, Kazımın bibisi Umüküs Zəngiyeva bir neçə gün öncə rayon ərazisində 10 min manatlıq torpaq satıb və onun pulu var. Bunu eşidən Vasif plan qurub və bibisinin evinə basqın etməyi təklif edib. O qeyd edib ki, bibisi və onun əri qorxaqdır, ər-arvaddan istədikləri qədər pul ala biləcəklər.
Gecə saat 3 radələrində dəstə üzvləri borc verən Asifin avtomobili ilə adıçəkilən ünvana gedib. Asif özü küçədə dayanıb, Kazım dostu ilə birlikdə açıq pəncərədən “banditizm” deyərək evə daxil olub. Arvad və ər pulun yerini demədikdə, dəstə üzvləri kişinin cibindən 241 manat, qadının çantasından 52 manat, dəyəri 1000 manat olan iki ədəd üzüyü və qadının qulağından 342 manatlıq qızıl sırğanı götürüb hadisə yerindən qaçıblar. Dostlar oğurladıqları pulu Asifə verərək borclarını ödəyiblər.
Hadisə barədə ailə dərhal hüquq-mühafizə orqanlarına məlumat verib. Kazım və dostu Vasif saxlanılıb. Dəstə üzvlərinin saxlanıldığını eşidən Asif izi itirmək üçün Balakən rayonu ərazisindən sərhədi keçərək Gürcüstana, oradan da Rusiyaya yollanıb.
Faktla bağlı cinayət işi başlanıb, Kazımla Vasif həbs edilib. Məhkəmənin hökmü ilə təqsirləndirilən şəxslərə cəza verilsə də, Asifin yeri müəyyən edilmədiyindən o, beynəlxalq axtarışa verilib. Rusiya hüquq-mühafizə orqanlarının əməkdaşları onu Moskvada saxlayaraq həbs edib və Azərbaycan tərəfinə təhvil veriblər. Şəki Ağır Cinayətlər Məhkəməsinin hökmü ilə Asif 10 il azadlıqdan məhrum edilib. Qeyd edək ki, adlar şərti verilib.
