Xaçmaz rayonunun Xudat şəhərində azyaşlı, anası tərəfindən döyülüb.
“APA”-nın məlumatına görə, hadisə M.Əbilov küçəsində baş verib. Qusar rayon sakini Səyyarə Qayıbova kirayə yaşadıqları mənzildə qızı 7 yaşlı Zəhra Qayıbovaya xəsarətlər yetirib.
Azyaşlı Xaçmaz Rayon Mərkəzi Xəstəxanasına yerləşdirilib, vəziyyəti kafi qiymətləndirilir. İlkin məlumata görə, anası qızını dərslərinə hazırlaşmadığı üçün cəzalandırıb.
Ailə, Qadın və Uşaq Problemləri üzrə Dövlət Komitəsinin mətbuat xidmətindən bildirilib ki, döyülən azyaşlı və ailədəki digər iki uşaq nəzarətə götürülüb:
"Ailədəki digər uşaqların eyni aqibəti yaşamaq ehtimalı nəzərə alınaraq onlar da nəzarətə götürülüblər. Hazırda polis əməkdaşları tərəfindən araşdırmalar davam etdirilir", - deyə bildirilib.
Faktla bağlı hüquq-mühafizə orqanları tərəfindən araşdırma aparılır.
