AZƏRTAC-ın məlumatına görə, yaz-yay ayları ilə müqayisədə qışda sahibsiz itlər daha çox görünür. Təkcə son bir həftədə şimal-qərb bölgəsində bir neçə hücum faktı qeydə alınıb, onların ikisi məhz Şəkidə baş verib. Sahibsiz itlər demək olar ki, şəhərin bütün küçələrində, parklarda və meydanlarda rast gəlinir.

Şəki Rayon Mərkəzi Xəstəxanası bildirir ki, 2025-ci ilin yanvar–oktyabr aylarında 1017 nəfər it dişləməsi səbəbilə müraciət edib. Onlara ilkin tibbi yardım göstərilib, quduzluğa qarşı peyvənd olunub. Xoşbəxtlikdən ağırlaşma və ölüm halı olmayıb.

Şəhər sakini, heyvansevər Dünyaxanım Həmidli bildirir ki, qış aylarında itlər yem tapmadığı üçün aqressivləşir:

“Sığınacaq olsa, yaxşı olar. Qışda itlər ac qalır, insan əlində ərzaq görəndə hücum edirlər. Mən öz pensiyamdan pul ayırıb yem almağa da hazıram. İnanıram ki, başqa sakinlər də qoşular”.

Şəhərin gediş-gəlişi sıx olan küçələrində it sürüləri görünür. Sakinlərin sözlərinə görə, oradan keçmək təhlükəlidir.

Bir müddət əvvəl it hücumuna məruz qalmış Anar Əfəndiyev deyir ki, qısırlaşdırılan bəzi itlər aqressivləşir:

“Buna baxmayaraq heç kim onlara zərər vermir. Sadəcə bu itlərin bir yerə toplanması lazımdır”.

Şəki Şəhər İcra Hakimiyyətinin şəhər üzrə nümayəndəsi Rasim Həsənov problemin gündəmdə olduğunu bildirib:

“Sığınacaq üçün dövlət fonduna 1 hektar torpaq sahəsinin ayrılması üçün müraciət edilib. Hazırda sənədləşmə işləri gedir. Bələdiyyə sahibsiz itlərin toplanması, birkalanması və peyvənd olunması prosesini davam etdirir. Şəhərin təmizliyinə riayət olunması ilə bağlı maarifləndirmə aparılır”.

R.Həsənov onu da əlavə edib ki, sahibsiz itlərin aqressivləşməsinin əsas səbəbi küçələrə atılan qida və zibil torbalarıdır. Sakinlər təmizliyə diqqət etməlidir. Sığınacaq layihəsinin yaxın zamanda həyata keçəcəyinə ümid edirik.