Qusarın kəndində 1-ci və 2-ci sinif şagirdləri təhsildən kənarda qalıblar. Bu barədə ShimalNews 23 sentyabr tarixində Real TV-yə istinadən məlumat verir.
Əvəcuq kənd tam orta məktəbinin binası dövlət tərəfindən inşa edilib və müasir standartlara cavab verir. Lakin sinif otaqları boşdur, müəllimlərin isə gözləri yolda, qulaqları səsdədir. Buna səbəb valideynlərin uşaqlarını məktəbə göndərməməsidir.
Yeni tədris ilində məktəbin sinifləri birləşdirilib. Valideynlər isə hesab edirlər ki, bu, onların övladlarının normal təhsil almalarına mane olacaq.
“Bax qızım dünən məktəbdən gəlib deyir ki, ana mənim başım ağrıyır. Deyirəm niyə? Deyir ki, siniflərimizi birləşdiriblər, 2-ci sinfi və 1-ci sinfi. 2 sinifdə də 7 uşaq var. Deyirlər ki, sinifdə 18 uşaq olmalıdır. Onsuz da 18 uşaq olmur. Uşaqlar üçün çətindir, proqram çətinləşib. Müəllim üçün də çətindir dərs keçmək. Bir dərsi bir müəllim keçir, bir dərsi digər müəllim. İbtidai sinifdir, müəllim dəyişməklə də olmur. Gərək ibtidai sinfə bir müəllim dərs keçsin”, - deyə şikayətçi valideynlərdən biri Sevda Əhmədova bildirib.
Şikayətçilərin sözlərinə görə, oxşar hal bir neçə il öncə də yaşanıb. Lakin məktəbdə çalışanlardan pul yığıldıqdan sonra məsələ həllini tapıb. Pul verməyənlər isə direktor tərəfindən töhmət alıb.
Müəllimlər də hesab edirlər ki, siniflərin birləşdirilməsi tədrisin keyfiyyətinə mənfi təsir edəcək.
Quba-Xaçmaz Regional Təhsil İdarəsinin Qusar Təhsil Sektorundan isə bildirildi ki, qeyd olunan məktəbdə şagird sayı az olduğu üçün siniflər birləşdirilib. Çünki bununla bağlı Nazirlər Kabinetinin qərarı var.
“Hər hansı bir sinifdə 10 nəfərdən az şagird varsa, həmin sinif ibtidai təhsil səviyyəsində digər 10 nəfərdən aşağı şagird sayı olan siniflərlə komplektləşdirilə bilər. Daha doğrusu, komplektləşdirilir”, - deyə Qusar Təhsil Sektorunun aparıcı məsləhətçisi Samir Hümmətov bildirib.
S.Hümmətov, həmçinin səsləndirilən rüşvət iddiasının əsassız olduğunu deyib. Valideynlərin övladlarını məktəbə göndərməkdən imtina etməsi məsələsi barəsində tezliklə araşdırma aparılacaq.
