Quba-Xaçmaz Regional Təhsil İdarəsinin müdiri Rüfət Hacıyev tərəfindən döyülən məktəblinin sinif rəhbərindən hadisənin necə baş verdiyi öyrənilib. Bu haqda ShimalNews 28 noyabr tarixində 7Times TV-yə istinadən xəbər verir.
Xaçmaz şəhər 4 saylı orta məktəbin 9-cu sinif şagirdi, 16 yaşlı Nizam Mirzəyev fiziki zorakılığa məruz qalıb. Şagirdin valideyni hadisədən sonra DİN-in 102 çağrı mərkəzinə müraciət edərək şikayət edib.
Şagirdin sinif rəhbəri Zenfira Hüseynova ilə əlaqə saxlayaraq, ondan baş verənlərin təfərrüatları öyrənilib. O, vəziyyətdən mütəəssir olduğunu bildirib:
“Təhsil İdarəsinin müdiri Rüfət Hacıyev hadisədən bir gün öncə də məktəbdə olub. Hadisə baş verən gün isə mən başqa sinifdə dərsdə idim. Döyülən şagird Nizam Mirzəyevin oxuduğu sinifdə həmin saat fizika dərsi tədris edilirdi. Rüfət Hacıyev həmin sinfə girib və dərs prosesini izləməyə başlayıb. Müəllimənin verdiyi suala cavab verən Nizam Mirzəyevin davranışları Rüfət Hacıyevi hiddətləndirib. Nizam qismən fiziki qüsurludur. Onun danışıq üslubu da bu səbəbdəndir. Rüfət Hacıyev şagirdin bu qüsurunun fərqinə varmadan sinif otağında onu döyməyə başlayıb. Daha sonra Rüfət Hacıyev həmin şagirdi direktorun otağına gətizdirib və həmin otaqda da onu yenidən döyüb. Biz hələ də şokdayıq, gözləmirdik ki, təhsilin başında oturan adam elə hərəkət etsin”.
Həmin məktəbin pedaqoji kollektivi məktəbə məsələ ilə bağlı müsahibə vermək istəyib. Lakin təhsil ocağına yaxınlaşan çəkiliş qrupu maraqlı mənzərə ilə qarşılaşıb.
Məktəbin inzibati binasının daxilində polis nəfərləri, ətrafında isə polis avtomobilləri növbə çəkirdi. Çəkiliş üçün müraciət edən müəllim kollektivi isə müsahibə vermək fikrindən daşındığını bildirib.
Bundan öncə, noyabrın 24-də - hadisə baş verərkən ShimalNews məlumat dərc etmişdi.
