Bu gün Azərbaycanda Novruzun ilk çərşənbəsi qeyd olunur. Su çərşənbəsi, həmçinin “əvvəl çərşənbə”, “sular Novruzu”, “gül çərşənbə” kimi də tanınır.
Su çərşənbəsində kənd yerlərində insanlar çaya gedirlər, axan suda əllərini, üzlərini yuyurlar. Qədim inanclara görə, bunu etməklə onların üzərlərində olan bütün pisliklər həmin suya tökülərək məhv olacaq, onlar isə yeni ilə saf daxil olacaqlar. Şimal bölgəsində olan adətə görə, bulaqdan su götürən qadınlar onu küçə boyu qapılara, hasarların dibinə tökürlər.
Su çərşənbəsində insanlar Novruz bayramına hazırlıqlara başlayırlar. Həmin gün süfrələr bəzədilir. Bu çərşənbədə masaya su qoymaq lazımdır, həmin suyun masa üzərinə aşması isə ilin bərəkətli olacağından xəbər verir.
