“Xoşbəxtsən ata! Ruhun şad olsun! Bilirəm ki, ruhun şaddır. Çünki sənin 100 yaşın öz torpağında, öz həmyerlilərinin yanında olacaq. Düzdür, Bəşir Səfəroğlu Bakıda doğulub, amma bizim kökümüz Qubadandır”.
Shimal.News məlumat verir ki, bunu xalq artisti Afaq Bəşirqızı deyib.
Bəşir Səfəroğlu 11 mart 1925-ci ildə Quba rayonunun Rustov kəndində (o vaxtı Bakı qəzasının tərkibində olub) doğulub. O, 7 illik təhsilini Bakıda alıb və ailə vəziyyəti ağır olduğuna görə, məktəbdən uzaqlaşmalı olub. Artıq 14 yaşından etibarən şoferlər klubunun dram dərnəyinə gedib. Kiçik intermediyalarda, birpərdəli məsxərələrin tamaşalarında kiçik rollar oynayıb. 1941-ci ilin axırlarında İkinci Dünya müharibəsinə yollanan Bəşir 1942-ci ildə hərbdən kontuziyalı qayıdıb. Onun dili tutulub və qulaqları çox ağır eşidib. Bir müddət fəhlə, yük maşınının sürücüsü işləyib. Rejissor Niyaz Şərifovun məsləhəti ilə Bəşir müntəzəm olaraq teatrın tamaşalarına gəlib. O, tamaşalara baxmağa başlayıb. Bir müddət sonra isə onu truppaya aktyor qəbul ediblər. Ardınca keçirdiyi ani həyəcan onun dilinin açılmasına səbəb olub və o, aktyor kimi fəaliyyətə başlayıb.
Bəşir Səfəroğlu “Aygün”, (Əmirxanın dostu), “Qəribə əhvalat” (Cəmil), “Əhməd haradadır?” (Sərxoş), “Ulduz” (Gülümsərov), “Xoca Nəsrəddinin 12 qəbri” (Nəsrəddin), “Yun şal” (Kişi) və “Yaşamaq gözəldir, qardaşım” (Səfər) filmlərində çəkilib. O, 1960-cı illərin ortalarında Azərbaycan Dövlət Filarmoniyasında təşkil olunan “Gəlməli, görməli, gülməli” miniatür teatrında onlarla satirik obraz yaradıb.
Bəşir Səfəroğlu 1964-cü ildə Əməkdar artist, 1968-ci ildə isə Xalq artisti fəxri adlarına layiq görülüb. O, 1969-cu il martın 23-də vəfat edib və Fəxri xiyabanda dəfn olunub.
