Şəkidə güclü yağışlardan sonra Qudula kəndində yenidən fövqəladə hal yaranıb.
Shimal.News-a daxil olan məlumata görə, kənd olar demək ki, iki yerə bölünüb.
Sakinlərin sözlərinə görə, problem artıq təkrarlanan xarakter alıb. Son günlər yağan intensiv yağışlar nəticəsində dağ çaylarında suyun səviyyəsi yüksəlib. Onlar suyun Əyriçay Su Anbarına dolduğunu, daha sonra anbardan sızaraq kənd ərazisinə yayıldığını bildirirlər.
Hazırda bir neçə evin həyətyanı sahəsi və zirzəmisi su altında qalıb. Yaşayış məntəqəsindən çıxış demək olar ki, mümkün deyil. Kəndə gediş-gəliş yalnız bəzi hallarda traktor vasitəsilə həyata keçirilir.
Bu vəziyyət xəstələrin və uşaqların hərəkətində də ciddi çətinlik yaradır. Sakinlər bildirirlər ki, təcili tibbi yardıma ehtiyacı olan insanların kənddən çıxarılması belə problemə çevrilib.
Sakinlərin sözlərinə görə, kənd sakini Elxan adlı şəxs hazırda ağır onkoloji xəstəlikdən əziyyət çəkir. Onun oğlu hərbçidir. Su basqını səbəbindən ailə evdən çıxaraq məktəb binasına sığınmalı olub. Evdəki əşyalar isə su altında qalıb.
Kənd sakinləri bildirirlər ki, yaşayış məntəqəsindəki evlərin əksəriyyəti su altında qalıb.
Sakinlər aidiyyəti qurumlardan Qudulada vəziyyətin qiymətləndirilməsini, təxirəsalınmaz tədbirlər görülməsini və kəndlə nəqliyyat əlaqəsinin bərpa olunmasını xahiş edirlər.
