Şabranın mərkəzi küçələrində məişət tullantılarının vaxtında daşınmaması nəticəsində zibil qalaqları yaranıb.
Shimal.News xəbər verir ki, Heydər Əliyev prospekti, Nizami Gəncəvi, Babək, Təbriz, Məhəmməd Hüseyn Şəhriyar və digər küçələrdə antisanitar vəziyyət yaranıb.
Küçələrdə yerləşdirilən zibil qablarının ətrafında məişət tullantıları toplanıb, bəzi yerlərdə isə zibillər ətrafa səpələnərək geniş əraziləri əhatə edib. Tullantıların çox olduğu bəzi sahələrdə zibil qablarının özünü görmək belə çətinləşib.
Ərazidə plastik qablar, sellofan paketlər, karton qutular və digər məişət tullantıları ilə yanaşı, heyvanların da zibil qalaqları arasında qidalandığı müşahidə olunur. İnək, qaz və sahibsiz itlərin tullantıların arasında olması vəziyyətin yalnız estetik problem olmadığını göstərir.
Sakinlərin sözlərinə görə, tullantıların uzun müddət ərazidən götürülməməsi şəhərin mərkəzində ciddi narahatlıq yaradıb. Açıq ərazidə yığılan zibillərin həşərat və gəmiricilərin yayılması üçün də əlverişli şərait yarada biləcəyi bildirilir.
Şabranın bəzi ərazilərində, xüsusilə dəmiryolunun ətrafında tullantıların yandırıldığı da qeyd olunur. Plastik və digər məişət tullantılarının yandırılması zamanı ətrafa tüstü və kəskin qoxu yayıldığı bildirilir.
Vətəndaşlar hesab edirlər ki, problemin həlli yalnız ərazilərə zibil qablarının qoyulması ilə məhdudlaşmamalıdır. Onların fikrincə, tullantıların vaxtında daşınması, küçələrin mütəmadi təmizlənməsi və nəzarətin gücləndirilməsi vacibdir.
Şabran sakinləri aidiyyəti qurumlardan şəhərin mərkəzi küçələrində yaranmış vəziyyətə müdaxilə etməyi və təmizlik işlərini gücləndirməyi xahiş edirlər.
