Xudat şəhərinin Bostançı yolu istiqamətində yerləşən yeni yaşayış massivində məişət tullantılarının idarə olunması ilə bağlı ciddi problem yaşanır.
Shimal.News-a daxil olan məlumatlara görə, ərazidə zibillərin atılması üçün nəzərdə tutulmuş sahə bir müddət əvvəl dəmir yolunun yanında yerləşirdi. Lakin tullantılar uzun müddət yığılaraq ətraf mühitə və sakinlərin sağlamlığına təhlükə yaratdığı üçün ərazi sonradan təmizlənib. Bununla belə, hazırda ərazidə nə zibil konteyneri var, nə də tullantıların daşınması həyata keçirilir.
Sakinlərin bildirdiyinə görə, insanlar məcbur qalaraq məişət tullantılarını bazar ərazisində, “Şollar” su kəmərinin cəmi bir neçə metrliyindəki açıq sahəyə atırlar. Artan temperatur şəraitində bu vəziyyət ətrafda yaşayan ailələr üçün ciddi narahatlıq yaradır. Zibillikdən yayılan qoxu və antisanitar şərait sağlamlıq üçün də təhlükə mənbəyinə çevrilib.
Məsələ ilə bağlı dəfələrlə aidiyyəti qurumlara müraciət edilsə də, problem hələ də öz həllini tapmayıb. Sakinlər xüsusilə qeyd edirlər ki, tullantıların içməli su kəmərinin yaxınlığında toplanması əlavə ekoloji və sanitar risklər yaradır.
