Heykəltəraşlar, müxtəlif materiallardan (daş, metal, ağac və s.) heykəllər yaradan sənətkarlardır. Onlar həm estetik, həm də tarixi və mədəni mənaları olan əsərlər yaradaraq insanların düşüncələrini və duyğularını ifadə etməyə çalışırlar.
Heykəltəraşlar həm də bədii və texniki bacarıqlara malik olmalı, onların əsərləri həm estetik cəhətdən gözəl, həm də struktura və formaya görə düzgün olmalıdır.
Ölkənin şimalında yerləşən Xaçmazda və ümumiyyətlə Azərbaycanın müxtəlif bölgələrində heykəltəraşlıq sənəti ilə məşğul olan bir çox sənətkarlar olub və var.
Shimal.News-un əməkdaşı xaçmazlı heykəltaraş Şıxəli Təhməzov ilə həmsöhbət olub. O, sənətinin sirlərini bizimlə bölüşüb.
Müsahibəni təqdim edirik:
- Şıxəli bəy, öncə özünüz haqqında qısa məlumat verməyinizi istərdim.
- Mən 1958-ci ildə anadan olmuşam. 1984-cü ildə Razin (indiki Bakıxanov qəsəbəsi) peşə məktəbində təhsil almışam. Daha sonra Əzim Əzimzadə adına Azərbaycan Dövlət Rəssamlıq Məktəbini və Mirzəağa Əliyev adına İncəsənət universitetini bitirdim. 1992-ci ildən Hüseyn Əlizadə adına Quba İncəsənət universitetində 8 il müəllim olaraq fəaliyyət göstərmişəm. Hazırda Xaçmazda yaşayıram.
- Heykəltəraşlıq sənətinə necə başladınız?
- Sənətə böyük qardaşlarımın köməyi ilə gəlmişəm. Hər zaman da bu sənətə marağım olub.
- Heykəl yaradarkən ilham mənbəyiniz nədir? Hər hansı bir müəyyən bir mövzu və ya ideya ilə başlayırsınız, yoxsa proses təbii şəkildə formalaşır?
- Heykəl yaradanda daxili duyğularımın təsvirini verməyə çalışıram.
- Sizin üçün heykəltəraşlıq nə deməkdir?
- Mənə görə heykəltaraşlıq tarixin yaddaş yazısıdır. Birmənalı belədir.
- Bir heykəl üzərində çalışarkən hansı materiallardan istifadə etməyi üstün tutursunuz?
- Eskizi plastilindən, işi isə sement-betondan hazırlayıram.
- Çalışdığınız zaman daha çox texniki detallara, yoxsa emosional ifadəyə diqqət yetirirsiniz?
- Çalışıram ki, heykəlin daxili aləmi açılsın. Daha çox bunun üzərində işləyirəm.
- Siz əsərlərinizdə hansı mesajı vermək istəyirsiniz?
- Mənə görə yaradılan hər bir iş maraqlı olmalıdır. Maraqsız əsər yaratmamağa çalışırıq.
- Heykəltaraşlıqda hansı çətinliklərlə qarşılaşmısınız və bunları necə aşmısınız?
- Çətinliyim maliyyə ilə bağlı olub. Çox vaxt işləyirəm, pulumu vermirlər. Pulsuz da iş yaratmaq olmur.
- İlk əsərinizin yaradılması necə baş verdi?
- İlk əsərim gənclik arzusu kimi şirin olub...
- Sizcə, heykəltaraşlıq cəmiyyətdə necə bir rol oynayır?
- Heykəltaraşlıq cəmiyyətin yaddaşıdır. Yaradılan əsərin hər biri yaddaşlara həkk olunur.
- Xaçmazın girişindəki Koroğlu heykəli, Quba Nizami parkındakı heykəllər sizin əl işinizidir.
- Təəssüf ki, Koroğlu abidəsini götürüblər. Qubanın Nizami parkı isə mənim əziz bölgəmizə olan bir töhfəmdir.
- Tələbləriniz varmı?
- Bəli var. Hazırda ali məktəbə tələbə hazırlayıram.
Şimal bölgəsindəki insanların sənətə marağı necədir?
- Yaradıcılığımın çox hissəsini Qubaya həsr etmişəm. Quba sakinlərinin həqiqətən çox maraqlı yanaşmaları var. Mən onlardan çox razıyam.
Nəzrin Vahid
