Qusarda taxıl sahələrində məhsuldarlıq bir qədər aşağı düşüb. Bu barədə ShimalNews 26 iyul tarixində ATV News-a istinadən məlumat verir.
Taxıl sahələrinin yarıdan çoxu artıq biçilib. Dəmyə sahələrdə arpa və buğdanın biçini paralel aparılır.
Fermerlər bildirirlər ki, hazırda hektardan 3.5 tondan artıq taxıl toplamaq mümkün deyil. Buna səbəb yaz aylarında hava şəraitinin daha çox yağıntılı olmasıdır. Çətinliklər sırasında texnika üçün ehtiyat hissələri, biçilən sahələrin yandırılması da var.
“Dövlət çıxarışı olmadan subsidiya verilmir. Bu da ki, məhsuldarlığın aşağı düşməsinə səbəb olur. İndiyə kimi həmin o çıxarışların yarısını götürə bilmişik, yarısını götürə bilməmişik. Buna görə, məsəl üçün, torpağa lazım olan üzvi və qeyri-üzvi gübrələri çatdıra bilmirik”, - deyə fermer Müzafəddin Qayıtmazov bildirib.
Bu il Qusar rayonunda 23.830 hektar sahədə payızlıq taxıl əkilib. Onların 16.008 hektarı buğda, 7.822 hektarı isə arpadır.
